(06/02/2021) 沙田日賽精選

第6場   4 中華之光   8 進優自在   5 愛馬劍

「中華之光」今季於同程大勝超班馬「天天精彩」3個馬位，由於本身底子夠厚，即使加了10分應仍有望再贏。其後再跑3場都表現走樣，一來排外檔不合發揮，二來路程不合。

上次大敗後急急腳試閘，原本應打算跑12月尾的同程賽事，不過試閘後可能有點問題而放緩操練，所以休息了足足兩個月，我認為有充足的休息期反而對這匹上了年紀的7歲馬更有利，最近晨操不論拍跳及單跳都走勢吸引，狀態有贏馬水準。

查此馬歷來10次跑入前三名，有8次排1至5檔，包括4次贏馬，可見牠是匹極需要內檔幫助的馬匹，今次重返贏馬路程抽到3檔幫助極大，預期有贏馬時的形勢，若能回復水準不怕同場主要對手，成為半冷可博獨贏。

「進優自在」與剛剛贏馬的「三生好運」有點相似，能力未必太高，但表現卻十分可靠。上次跑同程排7檔，早段被頂在三疊，焗用未必適合的放頭跑法，結果仍能跑第二，今次排1檔形勢好轉，有機會如「三生好運」般提升名次贏馬。

「愛馬劍」上場大發神威於同程大勝3個馬位，終於跑出以往的三班底質，按理有機會繼續反彈，雖然排11檔預期形勢會差過上次，但也有兼固必要。