(14/02/2021) 沙田日賽精選

超級重心：第4場   14 醒旺財

「醒旺財」以往口勁較重，未懂留力，因此一定要放頭才有好表現，但已經常在1400米快放跑得好，上季跑第三只以短距離負於四班惡氣十足的「連連行運」及「三生有運」，絕對是高水準之作，能力肯定比一般四班短途馬高，現時跑1200米賺到級數。

上場跑1200米排4檔，起步後未有積極搶放，改跑法沿途守6,7位，頭兩段步速48秒1比正常五班步速更慢，入直路取位欠順，找到空位後又有點外閃，直至最後100米才真正取得平衡衝刺，但末段快達22秒38根本無得追，結果發揮論盡也追回一席第三，難度相當高，印證了牠級數高。這場馬反映出「醒旺財」表現成熟進步，一來跟馬跑遇上慢步速也跟得順無搶口，二來識追馬，可見牠已學懂留力，跑法變得更有彈性。

上場試準跑法後，今次賽前5課快跳全由韋達一手包辦，韋達對上一次親操此馬竟然是上年8月27日，相隔差不多半年才再操此馬，還要連操5課，出擊之意不言而喻，快跳走勢也相當吸引，狀態對辦。

排3檔形勢與上次相若，但上次試準跑法後，我估今次可能會跟前一點，換上騎功更佳的巴度，可望有更好的發揮，對手水準與上次相若，今次如無意外，可以穩勝一場。

第6場    3 博愛友威

「博愛友威」上季可在四班同程大勝一場，今季經常排外檔形勢欠佳亦有好表現，可見牠在四班甚有級數。上次難得抽到2檔，原本是贏馬黃金機會，可惜跑到氣管多血失準，健康更蒙上陰影。

今次休息一個月再跑，賽前操練竟然比上次更辣，先試閘，再拍跳，最後試跑再落草地單跳，練馬師用行動對牠的健康投下信心一票，而且快跳走過相當爽勁，狀態大勇。

排6檔估計可切入二疊守好位，形勢不俗，用蘇銘倫擺明不服氣要拼個明白。我相信經過上次落飛至大熱門已輸怕不少人，今次應有較佳賠率，絕對有值博率，獨贏可以一博。