(28/03/2021) 沙田日賽精選

第7場   9 果然友

「果然友」早前於五班同程贏馬，當日牠頭三段步速與同日三班同程贏馬的「至尊高陞」相差不遠，結果總時間只是慢少少，而牠更多負7磅及莫雷拉一早收工無騎盡，否則時間更快，按此推斷這匹馬現時在四班負輕磅必定能贏馬。

雖然升上四班後跑了4場都未能贏馬，但一場排外檔留得太後追唔切，另一場轉彎走三疊蝕位才力戰僅敗，而最近兩場跑1600米則稍為嫌長，再加上近期都是相隔兩星期再出賽，或許有點吃力，相信對表現也有影響。

今次有兩大變數，第一是跑回贏馬路程1400米，排4檔估計有機會守二疊3,4位，與贏馬時形勢接近；第二是休息一個月再跑有充足的回氣期，賽前更特意北上從化操練，最近兩課草地拍跳步大力雄，相當有朝氣，有重新叉滿電之感，狀態肯定在大勇境界。

雖然欠缺贏馬拍檔莫雷拉，但換上成績甚佳的巴度估計影響不大，而且可望分多幾蚊，如獨贏有5倍或以上算值博，不作他想。

第1場   10 坪山新星

「坪山新星」本身不是早熟馬，而且之前未太適應環境，因此到今季5歲降至30分才開始找到反彈點，只是礙於跑法太過被動追唔切，所以至今仍未贏馬。今次跑1400米排2檔可能未必需要留得太後，因為早前即使跑1200米也試過守7,8位，這個檔位可望提升爭勝機會。

至於賽前操練亦見心思，先快跳、後試閘、埋門齋踱步，與季初頭兩場跑入前三名的操練程序一模一樣，而且今次快跳十分有氣勢，試閘的追勢亦理想，最後踱步更見輕盈有彈力，狀態可說是已推至頂點，我認為是今季最好一次，出賽或許能跑高多少，有望打開勝利之門。