(08/04/2021) 跑馬地夜賽精選

第9場   4 都靈紅星

「都靈紅星」高峰期於90分贏馬，即使今季於66分贏馬反彈，現時評分亦只是71分，或許現時7歲實力有點退步，但打了九折後現時評分應該仍有反彈空間。

前次出戰1650米同程，早前跟前遇上不利的超快步速，牠自己頭兩段的分段時間比標準時間快近1秒，轉入直路彎又走3,4疊發力蝕位，結果仍能跑第四，只負個多馬位，表現十分出色，證明現時評分確實未反彈完。

雖然上次跑1800米表現一般，但牠跑1800米其實稍為嫌長，表現一向不及1650米，今次重返1650米可望能跑回水準。排1檔可望守於放頭馬後等食糊，形勢大好。晨操最後試跑出腳又輕又爽，狀態比早前贏馬時更佳。用騎功不差但欠叫座力的馬雅，保證一定有肉食，這匹半冷門值得一博。

第8場  6 晨曦飛馬

「晨曦飛馬」上次我已提供，正如上次所說，這匹馬現時已重入正軌，按理評分十分有利，可望追落後。上次排檔欠佳，焗住留後衝一段，未必是其最佳跑法，結果以短距離落敗跑第三，表現可以接受。

今次排1檔，可望一如以往贏馬般跟前一點守5,6位，應是近期形勢最好一次。雖然早前曾經退出，但只缺課幾日，賽前快跳及踱步都十分活躍，狀態對辦，問題應不大。今次對手無多，贏馬黃金機會，縱然成為熱門也要再揀一次。