(10/04/2021) 沙田日賽精選

第2場   10 鑲藍旗

「鑲藍旗」上季晨操出腳欠順，不夠清脆利落，未及水準，所以7次出賽都無表現是可以理解。

今季暑期晨操所見，出腳明顯比上季暢順，力度和氣勢也有提升，所以季初曾經吸引到莫雷拉兩次試閘，只是不知何故決定棄騎，結果季初兩次出賽仍然無起色，事實證明「雷神」的判斷正確。

直至上次跑回直路1000米，換上陳嘉熙兼初戴眼罩，意外地產生化學作用，跑入一席第三只負個多馬位，更拋離今次又再同場的「怪獸媽媽」幾個馬位，而頭兩名馬匹之後升上第四班都有好表現，證明賽事水準不低，「鑲藍旗」在晨操的進步終於在出賽展現。

今次休息近4個月再跑同程，期間例課無缺，應是立心等直路1000米才再跑。直路賽一向貼近外欄較著數，排10檔是理想檔位。陳嘉熙雖然騎功普通，但上次總算證明人馬合拍。

近期晨操所見，感覺牠的前胸及後莊比之前拙壯，馬身收得比之前更紮實，毛色相當深潤，快跳有暗勁和氣勢，狀態應是歷來最好一次，有望提升名次打開勝利之門。